Ua faalauiloa nei e le faletupe o le National Bank of Samoa poo le NBS, se tasi o ana tautua ua amata i lenei tausaga fou, o le a maua ai se fesoasoani ma se faamāmā avega mo le tatou atunuu o alala i nuu ma afioaga i tua, i latou e tau mamao ma lala o lea faletupe e lē gata i Upolu a o Savaii.
Ua iai nei ni taavale o le ituaiga o le van, o le a taamilo i nuu i tua mo le ofoina atu o le auaunaga o loo faia e lea faletupe i lona nofoaga autu i Apia ma lala o le National Bank of Samoa.
O le a agai sa’o ane le atunuu i nuu i tua i le aufaigaluega o le a faatautaia lea auaunaga, ma faia ai a latou teugatupe aemaise o le aufaifaatoaga o loo iai a latou teugatupe i le NBS.
E fā nofoaga o lea faletupe i le atunuu ma e tau mamao tele mo nisi, ae o le a lē toe malaga mamao i Apia poo Salelologa ae agai sa’o i nofoaga o le a agai iai ia taavale mo le tuuina atu o le auaunaga a le faletupe.
