O le aupasiketi a le atunuu i le vaega o tamaitai e i lalo o le 16 tausaga le matutua lea o loo auai i lenei taamilosaga. 

E lua taaloga sa lē manuia ai le taumafai a nei alo o le atunuu e pei ona taaalo ai ma le ‘au a Iapani ma manumalo ai Iapani i ‘ai e 106 i le 28 a Samoa faatasi ai ma le taaloga anapo ma le ‘au a Niu Sila lea na manumalo ai ia Samoa i ‘ai e 80 i le 51.

Na faaalia e le faiaoga, Lisa Epa Hogben le tulaga o taumafaiga a le ‘au. 

“O le tulaga i le taaloga ma Iapani e tele avanoa na tuuina atu i le ‘au a Iapani ma e tatau ona vaai lelei le polo e le tatou ‘au. 

“O le ‘au a Niu Sila e fai lava si malosi o a latou guards ma e malolosi foi e sikoa a latou ‘ai. 

“O le tulaga la i le taaloga anapo e 100 pasene le taumafaiga a le tatou ‘au pe a faatusatusa i le la taaloga ma Iapani.

“O le goal lava sa tuuina i le ‘au ia mataitu lelei le taimi e taaalo ai aemaise lava i le faaaogaina o le polo.”

O sui uma o le ‘au a tamaitai o loo tauaveina le tagavai a le atunuu i lenei taamilosaga faavaomalo e le o auai ai se sui mai Samoa nei ona na ta’ua e Hogben, e le o avanoa mai mo lenei taamilosaga.