Ua taunuu i Samoa le kamupani mai fafo ua faaigoaina o le Salvor o le latou galuega o le taumafai e aveese uma suāuu o loo i luga o le vaa su’esu’e o le fitafita o le sami a le Malo o Niu Sila le HMZS Manawanui, o loo goto i gataifale i Saute o le motu o Upolu.
O le Aso Tofi na te’a nei na tuuina atu ai e lea kamupani i le komiti a le malo o Samoa e feagai ma galuega fesoasoani pe a tula’i mai ni aafiaga e lamatia ai le gataifale, le latou ata o le fuafuaga poo le plan mo le aveesea o suāuu o loo i luga o le vaa su’esu’e.
Ua faailoa i se pepa o faamatalaga o le aumaia o lea kamupani o loo faatupe e le malo o Niu Sila e ala i le vaega o le puipuiga a lea Malo.
O le vaiaso nei o loo ua amata ai galuega mo le aumaia i Samoa o se lanisi e faaaogā i le galuega a le kamupani o le Salvor, e pei ona fautuaina ai ma le atunuu aemaise i latou o alala tau lalata i le ogasami o loo faia ai ia galuega, ina ia lipoti atu ni vaaiga o ni suāuu masaa, faapea nisi meafaitino mai le vaa su’esu’e e vaaia i o latou gataifale.
O sui o le faalapotopotoga mo le puipuia o le siosiomaga o le Pasefika le SPREP, faapea sui o matagaluega a le malo o Samoa e fitoitonu i galuega mo le puipuia o o tatou gataifale, o loo galulue faatasi i le mataituina o galuega o le a faatino.
O le nofoaga foi o su’esu’ega faasaienisi a le malo o Samoa o loo faia sailiiliga i figota ma i’a mai ogasami o loo goto ai le Manawanui ina ia mafai ona iloa ai ni aafiaga o meaola o le sami mai suāuu masaa.
O ia su’esu’ega o loo faatino e le nofoaga su’esu’e le SROS, e tāua tele mo le faamautinoa ai o le saogalemu o ia ma figota a o le’i toe tatala le fagotaina o ogasami o nuu ma afio’aga o loo aafia.
Ua silia nei i le lua vaiaso talu ona faia le tapu o le fagotaina o ogasami o loo goto ai le vaa su’esu’e o le Manawanui.
Ae i le faai’uga o le vaiaso sa lipotia ai le faia o se su’esu’ega a leoleo i nisi o faifaiva ua latou solia ogasami o loo goto ai lea vaa su’esu’e e pei ona aofia i le tapu.
O ia faifaiva sa latou pu’eina se ata video mai le vaega tonu o loo goto ai le vaa ma latou faasalalau i le api o foliga vaaiga o lea nofoaga ma le suāuu o loo masaa i fafo.
