Ua toai taunuu i laufanua o Samoa le aumalaga o sui o le asosi o alii ma tamaitai, o i latou o alo ma tamafanau a Tutuila ma Manu’a sa tautua i le fitafita a le Iunaite Setete o Amerika.

O le autu o lea faigamalaga e toa 25 o le fia auai i le sauniga faamanatu o fitafita na maliliu i le Taua Lona Lua o le Lalolagi le ANZAC day o le a faamanatu i le sauniga masani i lalo o le uati tele o loo i le taulaga i Apia.

O le te’a o le fitu i le afiafi o le Aso Lua o le vaiaso nei na taunuu ai i le uafu i Apia le vaa o le Malo o Amerika Samoa le Manu’atele ma le aumalaga.

O le ‘ava o le feiloaiga na faatino i le maota Samoa o le pulega o tagata tafafao mai Samoa sa faafeiloai ai le faigamalaga e le Pelesetene o le asosi o fitafita ua toe foi mai le taua le RSA le Afioga Tuala Tevaga Iosefo Ponifasio o le afioga foi i le Sui Palemia.

Sa maua se avanoa e faatalanoa ai le Afioga Tuala e tusa o tapenaga o le aso o le ANZAC day lea e pa’ū tonu i le Aso Tofi o le vaiaso nei, ma le malaga mai o sui o le asosi o fitafita a Amerika Samoa ua iu le latou tautua i vaegaau, aemaise o loo malaga mai foi nisi o fitafita sa tautua i vaegaau a Niu Sila.

O le sauniga o le aso o le ANZAC i lo tatou atunuu i lenei tausaga ua suia ai vaaiga i le pa uamea ua siomia ai le uati tele i Apia o loo iai le maa faamanatu o fitafita na maliliu i le taua.

O se nofoaga e tāua tele e pei ona faaalia e le Pelesetene o le asosi o fitafita ua toe foi mai sa tautua i vaegaau. 

Ua silia nei i le sefulu tausaga e lē o toe faamamaluina se aso malolo mo le ANZAC i Samoa ma sa toe fesiligia ai le Pelesetene o le RSA i sona finagalo i lea tulaga.

Le Pelesetene o le asosi o fitafita le Return Soldiers Association poo le RSA le afioga i le Sui Palemia, Tuala Tevaga Iosefo Ponifasio.