I le lamalama faai’u o le asiasiga taualoa a le ta’ita’i o le tatou malo le afioga i le tamaitai Palemia, Fiame Dr Naomi Mataafa ma lana aumalaga i le atunuu o Saina, o le amataga o le vaiaso nei na taunuu ai le faigamalaga i le aai tele o Beijing le laumua o Saina, lea o le a faagasolo ai ni feiloa’iga ma ni talanoaga ma ta’ita’i maualuluga o lea malo tele.

Ua faailoa i se lipoti a le ofisa sooupu o le Malo o loo malaga sona sui i le asiasiga taualoa, o le a feiloa’i atu le Palemia o le atunuu i le Palemia o lea malo ma faia ai ni talanoaga faavaomalo.

O le a feiloa’i atu ai foi le ta’ita’i o le tatou malo i le Pelesetene o Xi Jinping ma faia ai foi ni talanoaga i mataupu tau i le va o malo e lua e saga faamausalī ai pea sootaga faavaomalo o Saina ma Samoa o le a atoa i le tausaga fou le 50 tausaga o ia sootaga.

O le Palemia o lea malo na faafeiloa’ia le tō’ai taunuu o le ta’ita’i o le tatou malo ma lana aumalaga i le laumua o Beijing, ma o le Aso Tofi nei le aso mulimuli o le ulua’i asiasiga taualoa a le afioga i le tamaitai Palemia i le atunuu o Saina.