O loo i Tonga le afioga i le Ao o le Malo le afioga Tuimalealiifano Vaaleto’a Sualauvi II ma lana masiofo le afioga Faamausili Leinafo Tuimalealiifano, ona o le auai i le faauuga a le Iunivesite o le Pasefika i Saute e faia i lea motu tuaoi.
O le afioga i le Ao o le Malo o le faa-Ao lea o le Iunivesite a le Pasefika, ma o le mafuaaga o le tuua o le tatou atunuu ona o le faatinoina o ona tiute e ala i lona talia ma tauaao faailoga mo i latou ua faaiuina le taumafai i mataupu sa aoaoina ai i le iunivesite a le Pasefika.
O le Aso Faraile nei le faauuga ae o le Aso Lulu na taunuu manuia ai le faigamalaga i Tonga.
Faaalia e le matagaluega o le va i fafo a lea Malo, o le faatoa toe tulaueleele lea i o latou fanua o se Ao o se Malo i le tuanai o le 3 tausaga o tapunia tuaoi o Tonga mai le afea i ni malaga mamalu ma malaga masani, ona o le faamai.
