O ananafi na taunuu ai i laufanua o Samoa le faigamalaga a le alii minista o mataupu tau i le va i fafo o Saina, susuga Wang Yi. O lenei faigamalaga o se vaega o taumafaiga a le malo Saina ina iai pea sootaga faalemalo a le Malo Saina ma atumotu o le Pasefika, aemaise ina ia ofo atu la latou puipuiga i le Pasefika faapea ma le tulaga o fefaatauaiga.
Na matuā malupuipuia le taunuu mai o lenei faigamalaga mamalu i le malaevaalele i Faleolo. O le afioga i le tamaitai Palemia o Samoa, Hon Fiame Naomi Mataafa, le afioga i le Sui Palemia, Hon Tuala Tevaga Iosefo Ponifasio, ma nisi o faauluuluga o matagaluega a le Malo, na latou faatalia aloaia le taunuu mai o lenei aumalaga.
O le asō, Aso Toonai, 28 Me 2022 na faataunuu ai loa i le maota o le Turisi i Samoa i Matagialalua le faamoemoe autū o le malaga mai o le Minisita o le Va i Fafo o Saina.
O le feiloaiga a le minisita Mr Wang Yi, na feiloai ai ma le afioga i le Tamaitai Palemia na faatino ai loa nisi o sainigalima i le va o malo e lua, e faamautu ai sootaga lelei a nei malo, e ala i ni fesoasoani e tauala mai lea malo tele mo le malo o Samoa.
E ese mai le afioga i le Tamaitai Palemia, sa auai foi i nei sainigalima sui o le malo e pei o le faauluuluga o le Matagaluega o le Va i Fafo a Samoa, afioga Peseta Noumea Simi, le afioga i le Sui Komesina o Leoleo ma Falepuipui, Leiataua Samuel Afamasaga.
E valu atumotu o le Pasefika na lipotia mai le agai atu iai o lenei faigamalaga a le Minisita o le Va i Fafo o Saina, e aofia ai le Atu Solomona, Kilipati, Samoa, Fiti, Tonga, Vanuatu, Papua Niu Kini ma Timoa i Sasa’e.
