Ua taunuu i Samoa le tino maliu o le alo o le atunuu na i Ausetalia mo galuega faavaitaimi lea na faafuasei ona uma lona ola ao iai i galuega.
O le taule’ale’a ia Sefulu Palenapa Tauiliili o Puleia i Savaii sa auai i le aumalaga a i latou na malaga atu i Tasmania mo galuega faavaitaimi i Ausetalia. O le Aso Toanai na te’a nei na taunuu atu ai le tino maliu o lea alii i Samoa ma auina atu ai i le falemaliu i le falemai i Motootua.
E le’o mautinoa le mafuaaga o le maliu ai o lea alii ao iai i galuega. Sa faia se sauniga faapitoa i Ausetalia e manatua ai le alii o Palenapa ma na auai uma ai tagata Samoa o loo i lea atunuu o galuega faavaitaimi.
O se tulaga na faateia ai le toatele i le maliu ai o lenei alii ma na ave ai fa’amaisega o le aufaigaluega Samoa o loo i Ausetalia i le aiga o Palenapa ona o le malaga o le maliu ma le oti.
O le Palenapa e maliu ua 27 tausaga o lona soifua e to’a 6 ona tuafāfine ma lona tina fa’anoanoa ia Sitolo Tauiliili.
