O le Aso Lua 02 Me, 2023 na taunuu mai ai i laufanua o Samoa le tino maliu o le Afioga Akiepikopō Alapati Lui Mataeliga mai Niu Sila mo ona toe sauniga.

Sa faatalia e le Puleaga Faaakiepikopo Samoa – Apia i le Malaevaalele i Faleolo, ma faia ai se sauniga puupuu ma molimoli mai ai loa lona tino maliu mo le taulaga paia o le misasa sa osia lea i le Ekalesia Mikaele le Alekagelo i Leauvaa.

I le ala mai le Malaevaalele i Faleolo agai i Leauvaa sa vaaia le faatali i tafāala o Ekalesia i Aana.

Sa ufiina lona sa e le Paselika o Ana Paia i Leulumoega, faapea le Matagaluega o Paulo VI i Nofoalii aemaise o le Matagaluega a Maria Imakulata i Fasitoouta.

O le taunuu ai i Leauvaa na osia ai loa le taulaga Paia o le Misasa e le Afioga Patele Ponifasio Kelekolio.

Sa faia molimau a nisi o lea matagaluega e aofia ai ma le alii faipule ia Sala Fata Pinati.

Na mae’a lea ona molimoli ai lea o lona tino maliu e mapu i le falemaliu e tālia ai nisi o taulaga paia o Misasa ua faatulaga mai le polokalame a le Puleaga Faaakiepikopo Samoa Apia.

O Akiepikopō sa sii gasesase faanatinati atu i Niu Sila, ma maliu ai. Ua fuafua o le faaiuga o le vaiaso nei o le a falelauasi ai Lana Afioga.

O loo vaaia le tele o feau faamaise ma le loto nutimomoia o nisi o le Puleaga ina ua valaau le Atua i lē sa fai ma taitai ma tamā i le Puleaga ua 20 nei tausaga talu ona tofi mai na te taitai le Ekalesia Katoliko i Samoa.

O le afiafi nei Aso Lulu 03 Me sa faatasi ai Tupulaga Talavou o le Puleaga mo le osiaina o le Taulaga Paia o le Misasa i le Malumalu Faaepikopo Maria Imakulata i Mulivai sa osia lea e le Faatonu o Tupulaga Talavaou le Afioga Patele Siolosega Su’a.

Na le’i ofi le malumalu i tupulaga o le puleaga faapea tamaitai sa, tiakono ma faletua, e silia i le 20 Ositaulaga sa auai i le Taulaga Paia o le Misasa i le afiafi nei.