Ua taunuu i o tatou laufanua alii ma tamaitai talenia i le musika ma siufofoga mālie i le pese, o fā’ili o le Jetz mai Amerika ua aofia ai ni tamaitai mai Tonga ma se alii mai Samoa, faapea le fā’ili o le Bonafide mai le atunuu o Jamaica.

O le faamoemoe o le malaga mai o ia fā’ili e lua o le faafiafia  i le taumafaiga o le faaaliga o laei ua taulamua ai le Las Vegas Pacific Fashion Show ua iai sona lālā i Samoa.

O se taumafaiga o loo ta’imua ai se alo tamaitai o Samoa ua faamautu i Amerika lea sa malaga mai i ni masina e lei mamao atu e faamaopoopo ma tapena le koneseti ma le faaaliga o laei o le a tausinio ai nisi o pisinisi su’i ofu i Samoa.

O seleni o le a maua ai lea taumafaiga i le po o le Aso Lulu o le vaiaso nei e faia i le faletaalo numela tasi i Tuanaimato, o le a faatupe ai le aveina i Las Vegas o ni pisinisi sui ofu e faalauiloa ai a latou taumafaiga i le faaaliga tele o le a faia ai i le tausaga fou.

O siufofoga mālie o fā’ili o le Jetz ma le Bonafide i le feiloaiga ma tusitala i le faletalimalo o le Taumeasina.

O le po o le Aso Toonai na tea nei na faia ai se latou koneseti i Amerika lea na muamua taunuu iai, a o lei malaga mai i Samoa mo le koneseti ma le faaaliga o laei i le ogatotonu o le vaiaso nei.