Ua amata sauni tapenaga mo taaloga o le State of Origin pei ona masani ai i tausaga taitasi ma o le tausaga nei ua iai lipoti ua agiga i upega tafailagi i tapenaga a le ‘au a le setete o Niu Sa Uelese lea o loo ta’ua ai le faamautuina o ana tama taaalo mo le faamoemoe.
Ua faailoa i lipoti a le ABC i le asō o le sailiga o se ‘afa a le ‘au lea o loo taumatemate ai le toatele i avanoa o le alii o Jarome Luai ma Nicho Hynes i lea tulaga.
Toe ono vaiaso ona piki lea o le ‘au a le alii faiaoga Brad Fittler mo le uluai taaloga e faia i le Adelaide Oval.
Pei ona silafia o le tulaga sa umia lava e Luai mai le tausaga talu ai peitai o le agai ane i luga o le taumafai a le alii o Hynes mai le kalapu a Cronulla ua lu’itau ai lea tulaga.
O Hynes lea na mauaina le faailoga o le Dally M i le tausaga lenei ma sa tulaga maualuga foi lona taumafai i le 12 masina ua tuanai.
O le a faaauau pea lea taumatega mo le taimi nei ae le taumate o le taaloga a le Cronulla i le Aso Toonai nei ma le Bulldogs o le a atili mataitu ai se taumafaigaa a Hynes.
I isi lipoti sa faailoa ai e Nathan Cleary le lelei o le la sootaga ma Luai i tulaga ia i le ‘au ma o le a faatalia pea se faaiuga fai a le faiaoga ma le pulega o le ‘au.
