“O le tina lea na aumai i totonu anapo (po o le Aso Faraile), na sauaina e lona to’alua. E to’a fa lana fanau, ae lima masina o lona ma’itaga o loo tau’ave.”
Peita’i e faia lenei faatalanoaga ma le pulega o le Toomaga mo e Puapuagatia, i lona lotoa i Tuanaimato, Campus of Hope, Siliniu Lina Chang, ae ua toe vevesi atu foi ile au faigaluega, “ai e faalogo atu le fafine e le’o lelei lava lana faalogo i lona manava talu le mea na tupu anapo.” O le faamatalaga faapea ai lava na fasi atu i autafa ma ua tiga ai le manava, e oo mai nei ile taeao, e foliga ane ua le lagonaina se minoi a le pepe.
Ma toe faatopetope atu ai nei ile falemai le tina lea, mose fesoasoani.
E talanoa mai lava le tamaitai Perestene, Siliniu, ae ua “matua ou le lava lava, e le’i iloga lava ona maua se malologa talu mai lava le afiafi ananafi.”
E faia le faatalanoaga lenei , ae ua faatoa uma ane ona faatulaga lesi foi teineititi na avane i totonu i sauaga lava. “ole mataupu fou foi.”
O le fafine lea na taunuu ane i le Apitaga mo tina sauaina, anapo, (po o le aso Faraile) “e fai lava sina tele ole mataupu lea, a le aiga lenei, ona e aafia ai le tamaloa.”
Ole tama o le aiga e faigaluega, ae o le tina e nofo e vaai lana fanau, ole tamaititi laititi o le toafa lea e tausi, ua tusa ma le tausaga le matua, e ese mai le ma’itaga lima masina lea ua popole nei iai poo faape’i mai.
E taunuu le tina lea ma lana fanau anapo, ae o loo faamafanafana foi lesi tina ma lana ia foi fanau e toa tolu. “ole mea lava e tasi, osi tina lena, 23 tausaga le matua na fasi foi e lona to’alua, ae ua tolu masina o lona ia foi ma’itagata, ae toatolu lana fanau. Na aumai lava
ile po muamua na tatala ai le maota fou lenei mo latou.”
“Ia o lesi potu o lesi fafine ma lana fanau e to’afa, ae o lesi potu o lesi fafine ma lana fanau e to’alima.” Saunoa Siliniu, e le’o se mea fou lenei faafitauli o le la’u mai o tina
sauina ma latou fanau ile leva o le po. “Ua leva lava ona la’u mai fafine ile Toomaga, e le faapea na fau loa le fale omai tagata.
“O le tele o taimi sa omai ai,‘a utiuti avanoa ona tufa atu lea i aiga o sui auai, ole Toomaga e faanonofo ai mose taimi le tumau a’o togafiti o latou faafitauli.”
“O le mea lena na ofo ai tagata e fai le fale, ona o lea e mana’omia, aua o lea e faaaoga aiga o sui auai e tuu ai, aua e le tatau ona tuu faatasia ma tamaiti.”
Ua oo mai le faaiuga o le vaiaso, ae o lesi foi lea taimi pisi o sauaga, peita’i ua amata ona toe tilotilo ai le pulega i se isi laasaga ole aufaigaluega, ina ia toe faaaupegaina le auaunaga lenei e le gata o le aufaigaluega i tomai faapitoa ae o le lava o le malosi ma le numera fua
ile aofai o tina ma fanau ae o le tusa o le 100 tamaiti , mai le pepe e oo i le 18 tausaga le matutua, o loo api foi latou i lesi itu o le lotoa lenei, Campus of Hope.
O atagia i le talanoa a le afioga ile Peresetene, Siliniu, le ave leao lana faataua ile malosi e gafatia e le aufaigaluega o iai nei ma se faaopooga mana’omia.
Ma ua galulue faatasi ai ma le matagaluega o leoleo, i itu tau ile tulafono, i le tau faafilemu ma faaititia lava o sauaga i tina ma fanau i le tatou atunuu.
O aso uma lava toeititi o po uma lava e mana’omia ai fesoasoani o soo se itu. Ole laina 800 7874, e vili fua ai mo fesoasoani ile Toomaga, ua tauloto ele tele o tina ma fanau, o lesi lea auala o loo mafai ai ona oo atu le lima fesoaosani ile taimi lava e tupu ai le faaletonu.
Ae o le faafetai a le pulega o le Toomaga, ile malo o Iapani ma le latou aapa mai e faamalie lea foi manaoga sa avanoa pea i Samoa, ose fale e mapu iai ona tina sauaina ma latou fanau.
