Semanū lava le mataala o se tasi o tamaitai na faalavelave atu ina ua taumafai se tasi alii e ave faamalosia se tamaitiiti mai luga o le tram i le itu i Sasae o Melepone i le vaiaso nei.
Fai mai le Alaata 9 Ausetalia o le alii lea na taumafai e ave faamalosi le tamaititi sa faafuase’i ona ia tosoina atu le tamaitiiti i fafo ma le tram i Box Hill poo le toe kuata i le fā i le afiafi ananafi ina ua oo i le nofoaga i Edgar Road e tu ai le tram.
O loo fetaua’ina na taumafai lea alii e toso faamalosi atu le tamaititi i fafo ae momo’e ane si tamaitai sia ma toe toso atu le tamaitiiti i totonu o le tram. Na aga’i ese mai le alii lea ma aga’i loa i le taulaga faatau i le faaitu lea o Box Hill. E le’i iai ni manu’aga i le tamaitiiti ae ua faaauau nei su’esu’ega a leoleo ma faafetaia foi le fesoasoani a sia tamaitai.
Na talosagaina e leoleo soo se tasi e silafia ni faamatalaga i le mataupu lea poo lea foi alii ina ia fesoota’i ane.
