Tusia : Maina Vai
Ua faailoa mai e le Minisita o le Matagaluega o Faalapotopotoga a le Malo (MPE) lea o loo gafa ma faalapotopotoga tumaoti a le Malo, e aofia ai ma le Ofisa o Turisi ia Leatinu’u Wayne Sooialo, ua o’o atu ia te ia faasea a nisi o le aufaigaluega a le Ofisa o Tagata Tafafao Maimoa mai Fafo le Samoa Tourism Authority fa’asaga i le Ofisa Sili o Pulega ia Faamatuainu Suifua Lenata’i.
Na ia faailoa o le Aso Faraile o le vaiaso ua mavae na ia mauaina ai ia faasea tusitusia. Sa ia faailoa fo’i i le media o le ā le tu’umamaina ia te ia faitioga nei ua o’o atu ona e fai si ogaoga tele.
O fa’aseā na tu’uina mai e nisi o le aufaigaluega o loo tagi i le mataupu lenei i le media e aofia ai le ;
- Taufaa’amata’u e faamalolo mai galuega nisi o le aufaigaluega e lagolago atu i le vaega faaupufai o le FAST.
- Faamata’u i se tasi o le aufaigaluega e faate’a pe a toe filifilia mai o ia ma Ofisa Sili o Pulega mo le STA i le isi tolu tausaga o lumanai ai.
- E aofia ai foi ma le aveeseina o aseta a le ofisa e faaogaina mo ia ma lona lava lelei. Lafoina o upu masoā i nisi o le aufaigaluega.
- Fa’aoga tagata faigaluega a le ofisa e faia ana galuega i lona aiga ae o lo’o totogi e le malo o latou taimi.
Na faailoa e le Minisita e fa tusi o fa’asea ua taunuu atu i lona ofisa ma o loo silasila i le ala e faatino ai mataupu faapea.
Na fesiligia Faamatuainu i tu’uaiga ua faatulai mai i le lotoifale o le Ofisa o loo ia vaaia ma ia tali mai ai e faapea…” Ou te lē faamaonia pe te’ena fo’i ae ona o le tulaga e lei o’o mai ia te a’u tusi nei ma tu’uaiga, e mafai ai ona ou tali atu”
Sa ia faapea mai fo’i o loo iai ala o mea e ui ai mataupu faapea, e pei o le ala atu i le Board, ona logo lea e le taitaifono o le Board le Minisita ma faatino ai se suesuega o mataupu ma faaseā faapea…peitai o lea ua faate’ia o ia ua o’o atu i le Minisitā o le Matagaluega o Faalapotopotoga a le Malo ma alia’e mai ai ina ua fesiligia e le Media.
Na saunoa Faamatuainu o ia faatoa ia iloa ina ua fesiligia ia e le media i faasea nei i le faaiuga o le vaiaso ua mavae.
O loo faapea mai fo’i i latou o loo faaseā,e faigata tele ona agai i le ofisa ona sa ui muamua ae lei maua mai ai se tali, e iai fo’i nisi o le Board e vaega lelei ma le CEO o le ala lea ua ui sa’o ai i le Minisita o Turisi o le MPE.
Sa fesoota’i atu fo’i le media i le minisita o Turisi le Afioga Toeolesulusulu Cedric Pose Schuster mo sana tali pe faamaonia ua ia te ia faaseā nei ae lei manao e tali mai
O loo tausisi lava le Ofisa Sili o Pulega o se faiga lenei ua faia tonu i le taimi ua lata ina maea lana konekarate o se CEO mo le STA lea e maea ia Iuni o le tausaga nei, ma o lona lea masaloga o se faiga ina ia le manuia ai lana taumafaiga i le tofi mo le taimi lona lua. Sa ia faailoa fo’i ua ia uia foi tulaga tau tulafono e tusa ai o lenei mataupu ua faasaga atu ia te ia.
O le Aso Faraile na muta ai talosaga mo lea avanoa mo le isi tolu tausaga ma o loo toe talosaga ai Faamatuainu i le tulaga e pei ona ia tulai mai ai nei. Ua faailoa foi e i latou ua faaseā ua lata i le masina talu ona tuuina atu kopi o a latou faaseā i le Minisita o Turisi.
