Ua taualuga mai taaloga a le Olimipeka e pei ona sa faagasolo i Falani mo le lua vaiaso ma ni nai aso talu ai, lea na auai autaaalo mai atunuu e 206, ae tusa ma le 10,714 tagata taaalo sa tauva ai i faagatama eseese.

E lei faamanuiaina le autaalo a Samoa i se pine, ma ua toe taliu nei i fanua le au taaalo a le atunuu ma faamoemoega lelei o le a toe tapena malosi ma toe faufau lelei lo latou sa mo le isi Olimipeka o le a sosoo mai i le 2028 lea o le a faia i Los Angeles.

E ui lava sa iai lu’itau na feagai ma le ‘au a o auai i Falani ina ua maliu faafuasei si alii faiaoga o le aufusu, le susuga Lionel Elika Fatupaito, ae sa galulue pea le ‘au atoa e ua’i ma tuu atu atoatoa o latou mafaufau ma taumafaiga mo se ‘ai o le atunuu i nei taaloga iloga a le lalolagi.

Na talamalae le aulakapi ta’itoafitu a le Manu Samoa ma le ‘au ta’itoafitu a Ausetalia, i le ulua’i taaloga o lea taamilosaga ma e lei manuia le taumafaiga a le Manu Samoa 7s.

Sa faasolosolo mai taaloga na auai isi sui o le autaaalo a Samoa, ma e ui e lei tau lau o le faamoemoe i se pine, ae e maeu lava le tulai mai i le faatinoga o latou taumafaiga ma sa lelei foi tulaga i le faatulagaina o ‘ai i taaloga ta’itasi na tausinio ai.

E ui lava ua misi se pine a Samoa i lenei Olimipeka, ae o le mafai ona agavaa o le toatele o ni alo ma tamafanau a Samoa i nei taaloga tetele a le lalolagi, o se matuā maualuga mata’ina lena ua oo iai taumafaiga a alo o le atunuu.

O upu faalaeiau o loo faasoa solo ai tagata o le atunuu e molimoli ai a latou faamalo ia i latou na avea ma avefu’a o Samoa i nei taaloga o le Olimipeka i lenei tausaga, ‘E lē mua uma ni vaa’, ma atonu ‘O outou le asō, ae o matou taeao’ ma ‘E toe oso foi le la’.

E momoli le faamalo ma le faafetai ia i latou uma sa tausinio auā le igoa o Samoa.

O taaloga e iva na tauva ai sui o le autaaalo a Samoa:

1. Afereti (Athletics) – Alexanda Lelei Rose
2. Faipelega (Boxing) – Ato Leau Plodzicki-Faoagali
3. Alo Paopao (canoeing) – Tuvaa Marco Hugo Clifton & Samalulu Fuatino Teaho Clifton
4. Tuuga Vaafaila (Sailing) – Eroni Leilua & Vaimooi’a Astrid Ripley
5. Aau/Feausi (Swimming) – Johan Strickland
6. Siisii Uamea Mamafa (Weightlifting) – Don Opeloge & Iuniarra Sipaia
7. Piiga (Wrestling) – Gatu Akazawa
8. Judo – William Taiti
9. Lakapi Taitoafitu 13 (Rugby Sevens) – Vaa Apelu Maliko, Taunuu Niulevaea, Motu Opetai, Dan Patelesio, Vaovasa Afa Su’a, PJ Telefoni Limā, Alamanda Motuga, Jeff Levi, Neueli Leitufia, Tom Maiava, Paul Scanland, Paul Eti Alesana Slater, Faafoi Falaniko, Steve Onosai, Lalomilo Lalomilo, Malakesi Masefau, Malo Luteru.

E to’a 52 le aofai o le Team Samoa na masii mo le Olimipeka; e to’a 41 alii ma le to’a 11 o tamaitai.