Ua maualuga le faaeaea a le Manu Samoa 7 mo le tapuaiga a Samoa i soo se itu o le kelope e taualuga i ai lenei tausaga 2022.
O lea ua sii maualuga nei e le Manu Samoa le Ipu o le taamilosaga i le vae i Cape Town i Aferika i Saute, ina ua manumalo i ‘ai e 12 Samoa i le 7 a Niu Sila lea na la sueina le final.
Saunoa le faiaogaulu o le Manu Samoa, afioga Muliagatele Brian Lima, momoli le faafetai i le tapuaiga a Samoa i soo se itu o le kelope, aemaise le tapuaiga a le Ao Mamalu o le Malo, fono a Sui Tofia, le Tamaitai Palemia, le Kapeneta ma le Palemene faapea le tapuaiga a ao o faalupega.
Sa amanaia i le faamalo a Muliagatele le maualuga o taumafaiga sa iai uma ‘autaalo a Samoa i lenei tausaga, o le ‘au Netipolo, le ‘au Siisii Uamea Mamafa, le alo o Samoa o Jay Opetaia i lona manumalo i lana fusuaga, o le Junior Manu Samoa i le manumalo mai i le Ipu o le PacificAus Sports Oceania Rugby U20 Trophy, aemaise ai le maoa’e o le tulaga na tulai mai ai le Toa Samoa i le Ipu o le Lalolagi i le Lakapi Liki.
Saunoa Muliaga, o a ni faafitauli na feagai ma si o tatou atunuu mai le amataga o lenei tausaga, ae o lea ua latou taualugaina mai i le manumalo ma o le latou meaalofa sili foi lea mo Samoa e taualuga atoatoa iai le maoa’e na tulai mai le faatinoga o taaloga uma a alo ma tamafanau a Samoa i lenei tausaga.
Na momoli ai ma le valaaulia a Muliaga i soo se Samoa o loo i atunuu mamao, ina ia afifio atu i Samoa e latou te fiafia ma patipatia faatasi le manumalo o autaaalo uma a Samoa, lea o le a fua uma i le taimi e taunuu ai le Toa Samoa e pei ona faagasolo ai nei tapenaga.
