O le masina o Mati o le tausaga nei na atoa ai le 17 tausaga talu ona faamautu le faiga paaga faavaomalo o Samoa ma le atunuu o Romania, ma o le Aso Lulu o le vaiaso nei na afea ai lo tatou atunuu e le sui o lea Malo mo Samoa le alii Amepasa o Radu Gabrial Safta mo le tauaaoina o tusi tofiga o lona filifilia i le Malo o Samoa.
O le afioga i le Sui o le Fono a Sui Tofia le afioga Le Mamea Ropati Mualia sa ia taliaina tusi tofiga o le sui o lea Malo mo Samoa e faamautu i Canberra i Ausetalia.
O sootaga faavaomalo o Samoa ma le atunuu o Romania o loo faatino i galuega i totonu o Malo Aufaatasi aemaise o le faalapotopotoga o le Iuni o Malo Europa.
O le masina fou o le a sainia ai le maliega ua ta’ua o le Apia Agreement i le va o atunuu o Malo Aferika Kerepeane ma le Pasefika ma le Iuni a Europa ma o le tatou atunuu o le a sainia ai lea maliega.
O le sauniga na tauaao ai tusi tofiga o le amepasa o lea Malo sa momoli ai le faafetai a le afioga i le sui o le fono a sui tofia e avea ai ma sui o le Malo o Samoa i le mauaa pea o sootaga o Samoa ma lea Malo, aemaise o le galulue faatasi i soo se taumafaiga e fesoasoani mai ai le Malo o Romania ia Samoa.
