O le taeao analeila lea na tauaao ai e le ofisa o fomai manu i Samoa le foai mai le Malo o Iapani e ala lea i se taavale e fesoasoani ai i ana auaunaga.
I pepa o faamatalaga o le faailoga lea o le lagolagosua a le Malo o Iapani i le puipuia ai o soifua manuia o manu a meaola i le atunuu.
O lenei fesoasoani e tusa lea ma le $202,000 e tauala mai lea i poloketi ua faaigoaina Japans Grant Assistance for Grassroot Human Security Projects lea o loo manuia ai le tele o vaega o atina’e a le atunuu.
O le iai o lenei taavale o le a fesoasoani tele lea i auaunaga a le ofisa o loo agai atu i afioaga mo taifau o loo maua i nofoaga lautele ma nisi o auaunaga.
O le naunautaiga foi lea o le fesoasoani a le Malo o Iapani ina ia mafai ona faalauaitele le auaunaga a le ofisa o fomai manu i Samoa ma faatupulaia ai le puipuia o nei meaola.
O le auaunaga a le ofisa o fomai manu o loo i Vailima ma e tele lona sao tāua i le togafitia ma puipuia meaola o loo tuuina atu e le mamalu o le atunuu.
Ua loa le tautua a lenei auaunaga i le atunuu e le gata i lo latou nofoaga ae ua mafai foi ona oo atu i tua i nuu i le siakiina o meaola aemaise o togafitiga.
