O le see atu o le afioga ia Fauo’o Fatu Tielu e fai ma Pule Sili o le kamupani vaalele a le Samoa Airways ia Iulai i le tausaga 2022 o loo iai le aitalafu a le kamupani vaalele i le silia ma le valusefulu miliona.
Mai lena aofa’iga mauluga sa iai le aitalafu a le kamupani seia oo mai i le taimi nei, o lea ua faailoa manino mai e le afioga i le Pule Sili ia Fauo’o Fatu Tielu ua pa’ū maualalo le aitalafu a le kamupani i le sefulutasi miliona.
I totonu o le sefulutasi miliona lea o loo iai i totonu le aitalafu tuai e fitu miliona tala e lei uma ona totogi.
Ma o se faaitiitiga tele ua iai le aitalafu a le kamupani vaalele lea sa galulue faatasi ai le malo ma le pulega a le Samoa Airways faapea le komiti faatonu e tau tuutuu ai i lalo le aitalafu.
O le totogiina o lea aitalafu o le tupe mai le malo e onosefulutasi miliona faatasi ai ma le tupe a le kamupani lava latou ia e silia ma le sefulutasi miliona lea ua faaitiitia ai i lalo le aitalafu tuai.
O le taimi nei o lea ua mae’a ona fai le fonotaga a le komiti faatonu ma ua faatonuina ai loa le pulega a le kamupani vaalele ua tatau loa ona toe tilotilo i le toe fai lea o se vaalele lapoa a le atunuu ae e tatau ona fai to’atasi e le malo.
Ma e iai le talitonuga o le finagalo foi lea o le malo ua tatau ona toe fai se vaalele, ae lē tatau ona faatopetopea, e tatau ona sailiili mālie ma faataoto lelei lona polokalameina.
O le mea sa iai le vaalele talu ai, o le tausaga lona lua i le faai’uga o le tausaga 2019 na gau ai le kamupani o lona uiga o lea gau, ua tele atu aitalafu nai lo meatotino, ua lē mafai e meatotino ona totogi aitalafu a le kamupani.
Mai ia Iuni i le tausaga 2019 faasolo mai le tausaga 2020 see mai le tausaga 2021 faasolo mai le 2022 na telē ai le faaletonu i le gau a le kamupani vaalele.
Faasolo mai i le tausaga 2023 o lea ua toe taoto mai i se tulaga lelei ua iai le Samoa Airways ina ua tele atu meatotino nai lo aitalafu.
O le tausaga lenei 2024 ua faasolosolo lava i luga le tele o meatotino a le kamupani nai lo aitalafu.
Saunoa le afioga ia Fauo’o Fatu Tielu, i le faatalatalanoaga ma le afioga ia Leiataua Savea ma le polokalame o le Gagaifo o Faiva, sa leai se faaletonu o le kamupani a o iai vaalele laiti ae ina ua fai loa le vaalele lapoa, e pei o iina sa tula’i mai ai loa le faaletonu o le kamupani ona sa lē faigofie ona faatonutonu le faatinoina o galuega a le vaalele ona e tasi le vaalele sa iai.
Sa faigata ona fai se tauvaga ma vaalele a Niu Sila, o le Fiji Airways ma isi vaalele mai Ausetalia.
O ni vaega o loo a’oa’oina mai e le kamupani vaalele a le Samoa Airways mai isi auaunaga e pei o Fiti ma Niu Sila.
O Fiti e fai si telē, ma e tele foi ona nuu e to’atele tagata e mafai ona o e tafafao ai, ae lē gata i lea e to’atele atu tagata Fiti nai lo Samoa.
O Samoa e lē tele ni ona motu e fai ai ni faletalimalo, ma e iai le talitonuga a le Pule Sili ia Fauo’o e lē tatau ona faata’ita’i fua i isi atunuu ae fai lava e Samoa le mea e tatau ona fai, e tatau ona fai fuafua i mea e mafai ona faatino.
Auā o atunuu ia e pei o Fiti, Niu Sila ma Ausetalia o ni atunuu tetele ma ua mautū a latou auaunaga i soo se mea.
Ae o le tautua lava ia a le kamupani vaalele e tatau lava ona fai le mea e mafai ona faatinoa ma faatupe.
