E tatau ona faia se iloiloga o le tamaoaiga o Niu Sila a o tali atu ai i le Koviti.
O le manatu lea o le Greens, National, ACT faapea lē sa avea ma faatonusili o le Reserve Bank, ma o se talosaga ua faia a o tuua’ia ai o le malo ma ana tupe o le Koviti faapea tupe na lolomi lea ua maualuga ai le tau o le soifuaga.
I lipoti ua toe sau nei e $58.4 piliona tupe faaalu a le malo mo le Koviti, ae $54 piliona tupe na lolomi e le faletupe tutotonu poo le Reserve Bank.
O le talitonuga o lē sa avea ma faatonusili i le faletupe, Arthur Grimes ua tele naua tupe lolomi ma ua umi tele na fai, ma e moni o lea sa sa’o ta’iala na amata ai peitai e le’i mamao le silasila i le aafia o le tamaoaiga o le atunuu mai nei tupe lolomi lea e lē gata o le alu ai i luga o tau o oloa ma auaunaga ae faapea le tau o aseta e iai fale.
I le talanoa ai i fale, i le aotelega o atunuu o loo i lalo o le faamalu o OECD e i luga laitiiti o le 10% ua alu ai i luga tau o fale, ae ia Niu Sila e oo mai i le faai’uga o le tausaga e 2021 ua toeitiiti 30% ua alu ai i luga, ma ua sili atu lea na i lo Ausetalia, Amerika, Mexico poo se isi lava atunuu.
Ua finau malosi ai sui o Itu agai e faia se iloiloga ina ia malamalama le atunuu aemaise o loo lagona le faigata o le taugata o le soifuaga ua iai nei.
E ese mai i polokiki, na saunoa lē sa faatonusili i le faletupe ua ia faatalosagaina foi le iloilo o faai’uga a le faletupe tutotonu e ala lea i le su’esu’e pe sa faia lona tiute e taofiofi ai i lalo le taugata o le soifuaga.
Ua fesiligia ai foi e Grimes le mafuaaga o le to’atele o sui sinia o le faletupe ua faamavae i nai taimi e le’i mamao atu.
