O loo faailoa se manatu a le Reserve Bank e faapea, e tatau i faletupe ona saunia ia lava ni a latou auaunaga e tuuina atu ai tinoitupe poo cash services i tagata ta’ito’atasi ma pisinisi o loo faaaogāina nei auaunaga i vaega eseese o le atunuu.
E ono vaiaso o loo tatala ai se faatalatalanoaga a le Central Bank e fia iloa ni finagalo o tagata lautele ina ia faamautinoa ma faatumauina le tele o ni auaunaga faapea e maua ai tinoitupe i totonu o itumalo.
Na ta’ua e le faatonu o le Reserve Bank New Zealand, Ian Woolford, o le saunia ma tauaao atu o tinoitupe, o le tautua autū lava lena e tatau ona iai a soo se faletupe.
E tatau ona saunia e faletupe na auaunaga ia latou customers e aunoa ma se tau e totogi, auā o le tinoitupe o se vaega e sili ona tāua o le sootaga a le faletupe ma le tagata o loo faaaogāina le latou auaunaga.
Fai mai Woolford, ua tele ina tau lē toe iai ni lālā o faletupe i nofoaga aemaise lava i pitonuu maotua lea e mafai ona aga’i iai tagata e tala mai i tua pe teu atu iai a latou tupe, ma faaliliu ai foi tupe.
O le tele o faletupe ua uuna’ia lava le faaaogā o polokalame i luga o le initaneti e fai uma ai na auaunaga e pei o le teu ma tala ni tupe; ma i le sefulu tausaga talu ai, e tusa ma le 40 pasene o lālā o faletupe ua tapunipuni.
Ae o le manatu o Woolford, ua moomia ona toe suia lenei faiga, ma o loo tatala le avanoa e faaali atu ai finagalo i se auala e toe sui iai.
E telē le aogā o tinoitupe i tagata, e pei ona faaaogā mo le tamaoaiga, o fuafuaga i meafai a le lautele ma fuafuaga faaleaganuu, ma o loo matou taumafai e faamautinoa o loo sologa lelei ma faigofie ona lava le tinoitupe e maua e tagata.
Puna o Faamatalaga: https://www.rnz.co.nz/news/business/587887/banks-must-provide-cash-services-to-customers-reserve-bank-says
