I le savalia ai nei o le 4 tausaga o le pulegamalo a le Faatuatua i le Atua Samoa ua Tasi lea ua aafia i tulaga lē mautonu lona maopoopoga, ae talu mai le amataga o le paeaiga lona 17 a le Palemene, o se tasi o ana fuafuaga o le atina’e sa latou folafola, o le faatūina o se pulega fou e gafa ma le faatonutonuina o oloa a le atunuu e faatau i fafo. 

O le Aso Tofi o lenei vaiaso na tino mai ai lea fuafuaga i le tatalaina aloa’ia o le ofisa tutotonu o le Pulega o Oloa Auina Atu i Fafo a Samoa, poo le Samoa Export Authority.

Ua tuufaatasi lea pulega fou a le Malo ma le faalapotopotoga o le Esetete Tausi a Samoa i le ofisa o lea faalapotopotoga a le malo o loo i Vaitele tai, sosoo ma le lālā o le faletupe o le Samoa Commercial Bank.

O le ta’ita’i o le Malo i le tamaitai Palemia, afioga Fiame Naomi Mataafa sa ooti le lipine ma saunoa e tatala aloa’ia lea pulega fou a le malo, o lona faauluuluga muamua o se tamalii o le atunuu sa faalauiloa e le malo i le tausaga ua mavae lona filifilia, o le afioga Pouli Dr Keneti Faulalo.

I le saunoaga a le Palemia na ia toe faailoa ai le mafua’aga o le faatūina o lea pulega fou a le malo e pei o le faateleina o fua tau faato’aga mo oloa, pe o le gaosia o oloa e auina atu i fafo e ala i le fesoasoani e sui faiga faifaato’aga mai i le na o le gaosia o taumafa faapea le tulaga o faiga faapisinisi poo le commercialization.

O nisi o ana galuega tauave autū o le faamaopoopo o le tulaga tau fesoota’iga a le aufaifaato’aga, ma le aufaatauoloa, ma i latou uma o loo faia auaunaga mo le atina’eina o oloa e auina atu i fafo, aemaise o le faamautinoaina o loo iai se si’osi’omaga talafeagai mo le auina i fafo o oloa mai Samoa.

O lea foi pulega na te unaia malosi le faalauiloaina o oloa mai Samoa mo le auina atu i fafo.

O lona aotelega o le Pulega o Oloa Auina Atu i Fafo a Samoa ua faatūina ina ia mafai ai ona faafaigofie ma faamaopoopo le auina i fafo o oloa ma auaunaga mai lo tatou atunuu.