Ua tumau pea ona iai Samoa atoa i le laasaga lua le lanu moli i puipuiga o le faama’i Koviti-19, peitai ua tatala le feoai o tagata ia latou fuafuaga masani ma ua faamautu ai foi le amata atu i le masina fou o Iuni ona malaga mai vaalele ma pasese mai Niu Sila ma Ausetalia i vaiaso taitasi, ae o malaga mai Fiti e ta’i lua vaiaso ma faia.

O lea foi ua toe foi le faia o feuiuia’iga o malaga i kamupani vaalele ma ofisa malaga e pei ona sa masani ai i le auaunaga a kamupani vaalele ma ofisa malaga e pei ona sa masani a o lei tapunia tuaoi faavaomalo o Samoa talu ona pepesi le faama’i i le lalolagi i le lua tausaga ua mavae.

Ua faailoa e le taitai o le Malo le afioga i le tamaitai Palemia le afioga Fiame Naomi Mata’afa i lana saunoaga faapitoa i le po anapo, o le toe foi o lea auaunaga i kamupani vaalele ma ofisa malaga o le a lē toe fesootai ai i le Matagaluega o le Va i Fafo ma Fefaatauaiga sa feagai ma le faamaonia o faigamalaga a tagata e toe foi mai ma pasese e tuua Samoa. O le aso muamua o le masina o Aukuso e tatala faaasoloatoa ai tuaoi faavaomalo o Samoa mo malaga masani. 

Ua faamautu mai foi e le tamaitai Palemia i lana saunoaga faapitoa, o malaga mai Fiti ma Niu Sila i le faaiuga o le vaiaso na te’a nei o le amataga lea o le faanofoesea i aiga o pasese e malaga mai mo le fitu aso pe afai e le aafia se isi i le faama’i. Ae o le toe tatalaina o a’oga uma i le atunuu ua faailoa e le tamaitai Palemia o le fono a le Kapeneta i le amataga o lenei vaiaso na faamautu ai le toe a’e o kolisi ma a’oga faaauau i le ogatotonu o le vaiaso nei le Aso Lulu, ae o a’oga tulagalua e faato’ā toe amatalia i le Aso Gafua 30 o Me, ma a’oga amata e toe a’e i le Aso Gafua le aso 4 o le masina o Iulai.

Ua faailoa e le taitai o le Malo o le vaiaso na te’a nei na faasopolia uma ai tuipuipui o fanau mai le 5 i le 11 tausaga le matutua peitai e manaomia le lua vaiaso e faamasani ai o latou tino i le vailaau o le tuipuipui a o lei toe ulufale i potu a’oga. O loo faaauau pea ona faia tuipuipui mo tagata uma e agavaa, ae mo i latou ua mae’a le tui lona tolu le booster ua faamauina nei le oo atu i le silia i le 74 afe tagata ua mae’a le tui faaopoopo lona tolu.

Ua faamauina nei ua 92.9 pasene le maualuga o le aofai o tagata mai le 18 ma luga atu tausaga o le soifua ua mae’a tuipuipui, 88 tesimale 3 pasene le maualuga o fanau mai le 12 i le 17 tausaga o le matutua ua faapena foi ona mae’a lelei tuipuipui, ae 83 tesimale 3 pasene le maualuga ua oo iai le aofaiga o fanau mai le 5 i le 11 tausaga ua mae’a o latou tuipuipui.

E ui i lea tulaga maualuga ua faamauina i pasene o tagata e agavaa ona maua le tuipuipui o le Koviti-19 peitai ua faailoa e le tamaitai Palemia o loo faaauau pea ona faagasolo le galuega o le tuiga auā o le puipuiga sili lea o le ola ma le soifua mai le faama’i o loo pesia ai nei le lalolagi.