Faamaonia mai e le Matagaluega o le Soifua Maloloina o loo saogalemu pea tagatanuu Samoa mai le Koviti19 ma e le’o sao i tua le faama’i talu ona aafia nisi o le pasese mai Brisbane Ausetalia.
O se ripoti lea mai se pepa o faamatalaga a le Matagaluega o le Soifua Maloloina ma ripotia mai ai le tatala i tua o le aufaigaluega uma sa faanofoesea. O i latou ia sa galulue i le siakiina o le pasese e to’a 73 na malaga mai Brisbane i le Aso 19 o le masina na tea nei.
Ua faafitu ona faia suega a le aufaigaluega sa faanofoesea ma e tumau lava le leai o se isi o aafia i le siama o le faama’i. E to’a 139 le aufaigaluega ua tatala i tua i o latou aiga talu mai le Aso Faraile ua mavae sei vagana tausi soifua e to’a 6 o loo faanofoesea pea ona o puipuiga o le faama’i lea o loo taofia pea o le nofoaga faapitoa i Motootua. E oo foi i tagata na faigaluega i galuega ave taavale i nofoaga o loo faanofoesea ai i latou na aafia lea o loo faanofoesea pea auā puipuiga malu o le lautele o le atunuu.
E 14 aso na faanofoesea ai le aufaigaluega lea ua tatala i tua i o latou aiga e galulue i auaunaga a le malo e pei o le Matagaluega o Leoleo, Ofisa o le Tiute, vaega o Femalagaiga o le Matagaluega a le Palemia ma le Kapeneta, le vaega a le Quarantine i le Matagaluega o Faatoaga ma Faigafaiva ma le Samoa Airways.
