O lea foi ua amata tatala mai le avanoa i tagata Aukilani e faaleo ai o latou manatu i fuafuaga o le paketi ae poo le a foi se faiga o le $295 miliona o loo tau su’e.
O lea ua maea ioeina e councillors a Aukilani le paketi faataoto e le i pasia mo le faatalanoaina i tua i tagata lautele, ma o loo sau ai i lea fuafuaga le faatau ese o sea a le council o loo iai nei i le malae vaalele i Aukilani, tusa lea ma le $2.2 piliona ae aumai sei tau fesoasoani i aitalafu ma nisi o tupe faaalu o moomia ai.
O le isi suiga tele ma talitonu o loo tele faalapotopotoga ma tagata Pasefika o loo iai i totonu, o le faaitiitia lea i le $3 miliona o tupe o loo tuuina mai i poloketi fai i tua i le komiuniti lea e aofia ai taaloga, aganuu ma nisi o faamoemoe.
I lalo foi o le fuafuaga ua tatala nei mo faatalanoaga o loo sau ai foi ma le sii o rates i le 7%, pe tusa ma le $66.50 e totogi i le vaiaso.
Mai le pulenuu o Aukilani Wayne Brown, e le o faigofie le $295 miliona o loo tau su’e o le paketi, poo upu faigofie o loo sioki ai le paketi, ma e foliga mai e ono faaopoopo lea aofai i le agai i luma.
O nei fuafuaga uma aemaise le agai i luma o le aai tele, fai mai Brown o loo faamoemoe mai i le talanoa atu o tagata ae e le i toe tapunia le avanoa i le aso 28 o le masina a sau.
