O tausi soifua, o le lumanai, o le malosiaga faaletamaoaiga o tausiga.
O le autu lea o le fono faaletausaga lona 69 a le sosaiete o tausi soifua faamauina o Samoa na usuia i le Aso Tofi o lenei vaiaso ma sa tatala i le saunoaga autu mai le taitai o le Malo le afioga i le tamaitai Palemia, afioga Fiame Dr Naomi Mataafa.
Na saunoa le taitai o le Malo ma ia faailoa o le ivitu o le auaunaga faalesoifua maloloina o le tautua faatausi soifua auā o se auaunaga e faia i le alofa ma le lagolago i tagatanuu taitoatasi, aemaise aiga i taimi ma’ale’ale ma faigata.
O tauisi soifua foi o toa magumagu ona o i latou o ta’imua i le faatinoga o le galuega faasoifua maloloina.
I le autu ua filifilia mo le fono faaletausaga a le sosaiete mo lenei tausaga na saunoa le tamaitai Palemia o se manulauti o loo faailoilo ai le malosiaga faaletamaoaiga o tausiga e faamamafa ai le tāua o tiute tauave o tausi soifua i le unaia o le atinae ma le tuputupu a’e o le tamaoaiga o le atunuu.
E lē gata ina sasaa lo latou sao i le auaunaga faalesoifua maloloina ae faapea i le tamaoaiga lautele o le atunuu e ala i o latou tomai faapitoa.
Faaalia foi e le taitai o le Malo o faigata na feagai ma le atunuu i le faama’i misela ma le Koviti-19 sa tumau pea le punouai ma le lē faalogologo tiga o tausi soifua i le faatinoga o le latou tautua.
