E ui ina to’ulu timuga ma savili faata’uta’u i le aso muamua o polokalame o le asiasiga taualoa i Samoa a le Tupu ma le Masiofo o le malo o Peletania, ae sa lē faaletonu ai le faagasologa o polopkalame na tapena e lo tatou malo.
Na amata mai lava i le ‘ava faatupu, sosoo ai ma isi polokalame e pei ona afea ai le afio’aga o Moataa ma afio ai le Tupu e savali i le nofoaga faasao o togātogo i lea nuu o le itumalo o le Vaimauga.
Na maua si masele i le aoauli ae na toe palasi foi uaga ina ua faasolo i le afiafi ae sa molimauina le laufofoga fiafia o le Tupu ma lana Masiofo, e pei ona afea ai Togitogiga i le aga’i i Falealili lea sa tatala aloa’ia ai e le Tupu, le toe fausia o le nofoaga mo tagata lautele o le Pupu Pu’e National Park.
Na asiasia e le Tupu le nofoaga e oo lava i le vaega o loo iai le afu.
O fale ma isi vaega e mana’omia lo latou faaaogāina e tagata e afea, ua mae’a ona toe fausia.
O se tasi lea o nofoaga e to’atele tulisi tafafao ma tagata o le tatou atunuu e afea mo tafaoga ma ta’elega i le afu o loo iai.
O lea la ua toe tatala ina ua mae’a fausia ma tapena vaega uma mo le faaaogāina.
O le tatalaina o lea nofoaga e le Tupu, o le polokalame mulimuli lea o le asiasiga taualoa i Samoa.
O le Aso Faraile le faai’uga o lenei vaiaso o le a auai le Tupu ma lana Masiofo i polokalame o le Fono a Malo o le Taupulega, ma toe tuua ai Samoa i le Aso Toonai pe a mae’a se feiloa’iga faapitoa ma le nuu o Siumu lea o loo faamautū ai i le faletalimalo o le Sinalei Resort.
