Ua amatalia nei le faagasolo ai o le taamilosaga siisii uamea mamafa a le Oceania i le Vaega o tupulaga talavou lea o loo faatautaia nei i Tuanaimato.
I le mae’a ai o le vaiaso sa faatinoina ai toleniga sa auai ai sui o ‘au mai atunuu o loo tauva i lenei taamilosaga.
O lenei faamoemoe na tatalaina e le Sui Palemia, Afioga Tuala Tevaga Iosefo Ponifasio.
“E amanaia e Samoa lenei faagatama ma lona atinaeina ma e faaauauina pea lenei lagolago i tauvaga faapenei.”
Saunoa foi se tasi o tamalii ua iloga i lenei taaloga ia Sam Coffa le tulimataia pea o tupulaga talavou ma le tulaga o loo taumafai ai i lenei taaloga.
“O loo amanaia pea le taumafaiga a tupulaga talavou i lenei taaloga ma e faafetaia ai le Malo o Samoa ma ona tagata ona o le lagolagosua e tusa ai o le faamoemoe.”
O lenei faagatama o se tasi o taaloga ua tele ina manuia ai le taumafai a alo ma fanau a Samoa e pei ona iai le amataga o lenei tauvaga lea na maua ai e le alii ia Falevaa Tafi le pine auro muamua i le vaega o alii Juniors o le 61kg.
E oo atu i le 300 sui taaalo faatasi ai ma Peresitene o pulega ma faiaoga mai asosi eseese o loo iai i le atunuu auā le faatautaiga o lenei tauvaga.
E 3 aso o loo faagasolo ai le tauvaga lenei i le atunuu.
