O le afiafi o le asō lea na tatala aloaia ai le amatalia ai o taaloga a le Samoa Games 2023 ma na auai ai sui taaalo o taaloga e 24 lea o le a tausinio.
O lenei sauniga na tatala aloaia i se saunoaga autu a le Minisita o Aoga Taaloga ma Aganuu, Afioga Seuula Ioane e patipatia lenei faamoemoe ua taunuu.
“O le Samoa Games 2023 o se auala tāua lenei e faailoa atili ai le atina’eina o taaloga.”
Na ia ta’ua ai le sao o taaloga i totonu o le atunuu.
“O le aiātatau a le tagata le auai i soo se taaloga e tausinio ai, e fiafia iai, e faamalosiau atu ai i isi ona tagatanuu i le agaga ma le loto fealofani.
“E avea foi taaloga e fesoasoani i le soifua maloloina o le tagata, e auala mai i le faagaioiina o le tino ma le aotauina o tagata i totonu lava o taaloga.
“E maua ai foi avanoa e tausinio ai i taaloga tetele a le lalolagi ma o le avea o fanau e fai ma ave fu’a o Samoa o se mitamitaga tele lea e le gata i aiga, totonu o afioaga, aemaise ai ekalesia.”
O le sao foi o taaloga i le tupe maua a le atunuu i lona tamaoaiga na ia saunoa iai.
“Sa tatou molimauina taaloga a le Pasefika i le 2019 lea na talimalo ai Samoa, sa vaaia ai le lolofi mai o tagata mai atunuu e mamao e maimoaina ma lagolago ‘au a atunuu o le Pasefika o se vaega tāua lea i le tupe maua i le itu tau turisi a le atunuu.”
“O loo molimauina pea e le Malo o Samoa lo outou galulue ai punouai auā le manuia lautele o fanau lalovaoa a Samoa i faagatama o le a alo atu iai.
“O le a matou tapuai atu ae omaia e alo i o outou faiva manaia.”
O se miti ua loa ona momoo ai le asosi o taaloga a Samoa e pei ona ta’ua e le Peresitene ia Pauga Talalelei Pauga.
“Ua leva ona mananao e faatino lenei faamoemoe ia faataunuuina lea ua tino mai.
“E avea ai foi le 60 tausaga o le Malo Tutoatasi o Samoa e faailo ai taaloga a Samoa o lo latou sao lea mo le tapunia aloaia ai o le 60 tausaga o Samoa.”
O le Samoa Games o le a filiina mai ai ‘au a le atunuu mo taaloga a tupulaga a Malo o le Taupulega lea o le a faia i Trinidad faapea ai foi taaloga a le Pasefika lea o le a faia i Solomona.
