O le faamoemoe ua taunuu o le laau lea o le ola, o le taulaga o viiga ma le faafetai i le Atua sa patipatia e le aoga tulagalua a Ranui i le vaiaso ua mavae ina ua faataunuuina ma le manuia se faatofala’iga sa faananau iai faiaoga Samoa o loo galulue i totonu o Ranui Primary School faapea mātua Samoa i le fia faatuina lea o se aoga Bilingual i totonu o lea aoga e faaaogāina ai gagana e lua o le gagana Samoa ma le gagana Peretania. 

O le susuga i le faafeagaiga ia Faapopo Semau na saunia le sauniga puupuu e tatala aloaia ai lea polokalame fou i totonu o lea aoga. 

Molimauina le lagolago malosi o mātua Samoa faapea le aoga atoa i lea faamoemoe auā o lea ua ausia e le aoga lea isi laasaga fou o le aoaoina o fanau aemaise lava i fanau Pasifika e faaaogāina ai le latou lava gagana. 

O le Samoan Unit Toloa A’oa’oina e 38 tamaiti o loo iai ae toatele lava o fanau Samoa. 

E toalua faiaoga o loo galulue ai i lenei vasega o le susuga ia Brenna Vailua o loo iai isi fanau ma le susuga ia Chantal Arona o loo iai tamaiti o loo lelei atoatoa le gagana Samoa. 

Ae na ta’ua e le susuga i le faiaoga ia Chantal Arona, o se tofa na a’e i faiaoga ma mātua Samoa ua tatau ona fai se vasega Samoa, ona o lea e matauina i totonu o le aoga e pito i toatele lava fanau Samoa i tamaiti uma o le Pasifika. 

Ma o le kuata lona fā o le aoga i le tausaga ua mavae na fono ai loa mātua ma faiaoga e talatalanoa poo le ā se igoa e ono faaigoa ai lea vasega. 

E lua ni igoa sa fai iai le filifiliga, o le Toloa A’oa’oina ma le Ola ma le Manuia. 

Peitai sa fai le palota ma iloa ai le toatele o mātua e lilifa o latou lagona i le Toloa A’oa’oina, ona e faapea e faatatau i le alagaupu a Samoa e Lele le Toloa ae Maau i le Vai, o lona uiga poo fea lava e alu iai le tamaitiiti Samoa e toe foi mai lava i lona aiga. 

I totonu lava o le aoga e matuā malosi lava le tautala o fanau i le gagana Samoa. 

Ma o se tasi lea anavatau lelei e faamalosia ai le tautala ma le aputiputi o fanau i measina o latou atunuu o le gagana.