E ui o le masina o Mati o le tausaga na te’a nei na amata faavae ai le iai o le Hai Komesina o Samoa i Fiti peitai sa faaaogāina fale sa nonofo ma faamautu ai seia oo ina tatala aloaia le Ofisa Fou mo le Komesina i Suva i lenei vaiaso.
O se tasi o matati’a tāua Ofisa o le Hai Komesina lea i nai aso na muamua atu na talimalo ai i nisi o le komiuniti a Samoa mo le faamanatuina o le 60 tausaga o le tuto’atasi.
Na auai i lea faamoemoe le Palemia o Samoa afioga Fiame Naomi Mataafa, Palemia o Fiti, Hon. Frank Voreqe Bainimarama, Palemia o le Atu Kuki Hon Mark Brown, faapea sui o le Kapeneta a le Malo o Fiti ma sui mai le Pasefika.
Na faaali le fiafia tele o ta’ita’i o Malo e lua, Samoa ma Fiti ona o lenei galuega tele ua tino mai ma o se auala e saga faamauaa ma faamausalī ai faiga faapaaga a Malo e lua.
Na ave ai le faamalo a Bainimarama i le afioga i le Sa’o Faapito mo le tulai mai i le tofi Palemia ae lē gata i lea na ave le faafetai i le Hai Komesina o Samoa i totonu o Fiti le afioga Aliioaiga Feturi Elisaia i le galuega fita lea ua tino mai. Na mae’a lauga ma felafolafoaiga i le sauniga o le tatalaina o le Ofisa fou ma ooti ai loa le lipine e tatala aloaia ai lea galuega tele.
