O le faasolo pea ina ogaoga aafiaga ua iai le taugatā o le penisini, na vaaia ai foi se isi faalavelave mata’utia i le taeao analeila, ina ua oo ane se valaau i le vaega a le fuimū i se ogapaipa tele o le suāuu e foliga na taumafai e tata’e ma faaleaga ma le loto iai e se tasi poo nisi i fafo ane o se pamu penisini i Aukilani i Saute, ma na lipotia le tafe solo o le penisini i lena vaipanoa i Great South Rd i Manurewa.
Na oo atu iai auaunaga mo faalavelave faafuase’i i le pamu penisini a le U-GO i le taeao analeila.
Na saunoa le Fire and Emergency NZ assistant commander, Chris Delfos, e foliga mai o se taumafaiga ina ia faaleaga le ogapaipa.
E lē o mautinoa i le taimi nei poo le ā se tele o le penisini ua ma’umau, e oo foi i uaea telefoni, na lipotia foi i le pe tusa o le 3am i le vaveao analeila ae faailoa ane le momotu e nisi o nei uaea telefoni, ma e iai le talitonuga atonu e iai se sootaga o nei gaioiga na faatino i lea taimi o le taeao analeila.
Fai mai Delfos, e matuā mata’utia lava ma lamatia ai le soifua pe a taumafai nisi e faaleaga soo se vaega o loo ta’i atu ai pe sapalai ai suāuu ma le penisini.
E moni lava ua iai le tulaga faigatā i le tau o le penisini, ma ua tele tupe ua faaalu e tagata mo le totogia o le penisini, ae mautinoa e lē o se mea e tatau ona ma’umau ai le soifua o se tasi.
O lenei faalavelave na poloka ai foi le feoa’iga a taavale i Manurewa i le taeao analeila ina ua poloka le isi laina o le auala a o taumafai atu le vaega o auaunaga lavea’i e tali atu i lea faalavelave.
Na ta’ua e le sui sooupu a le Fire and Emergency i le NZ Herald, na vili ane e se tasi le 111 e lipoti ane le malosi o le manogi o le penisini na latou sosogia, o lea na faavave atu ai le latou auaunaga i se nofoaga e latalata i Waiata Shores i Takanini ma iloa ia le ogapaipa ua tata’e ma ua faamautinoa foi o se gaioiga na fai ina ia faaleagaina le ogapaipa.
Ua faagasolo nei su’esu’ega mae’ae’a a leoleo i lenei faalavelave.
Puna o Faamatalaga: https://www.nzherald.co.nz/nz/emergency-incident-at-petrol-station-in-manurewa-auckland/IQ4IQQ4JUZDFRENBX7KGWH5QNY/
