Tapunia faamalosi le aoga i North Shore i Aukilani i le mae’a faamaonia ua maua se tasi o fanau aoga i le misela.
O le aoga maualuga a Albany Senior High School e faapea sa iai le case ua faamaonia nei i le aoga i le Aso Tofi ma le Aso Faraile o le vaiaso talu ai.
Faamaoniga mai le soifua maloloina anapo o lea ua faanofoesea uma tagata o le aiga o le case faamaonia ma o loo suesue pe na faapefea ona maua.
O loo iai masalosaloga o lea na pesia mai se tasi i totonu lava o Niu Sila.
O le faamaonia ua maua le tamaititi aoga anapo na sau ai loa ma le faatonuga i le 900 fanau aoga ma le tusa ma le tasi selau o faiaoga e aua ne’i sau se isi i le aoga i le asō faapea taeao.
E fitu aso e faanofoesea ai tagata e vavalalata sootaga ma le case ua faamaonia i le misela, ma o loo faaauau pea nei suesuega.
