Ua faaopoopo le isi nofoaga ua faia faapitoa e tapuaia ai le alofaiva o le Toa Samoa i Aukilani.

E ese mai fiafiaga i le aoauali faasolo atu i le afiafi a taeao i Magele, o lea ua tapena foi Otara mo le po a taeao.

O Otara ua faaupuina o le pati ma e faia lea i lona taulaga faatau mai le itula e 5 i le 10 i le po a taeao ma e le gata o faafiafiaga faaleaganuu, musika, siva afi ma isi.

A uma le pati, o lea ua faamautinoa mai foi ua talia e le Spark le laisene a le Otara Kai Village e mafai ona matamata ai le taaloga i le screen tele ma o le a mafai ona o atu ai aiga i le tolu i le vaveao o le Aso Sa e matamata le taaloga i le kapaka a le maketi a Otara.

O faatasiga ma faafiafiaga ua tapena i Magele ma Otara a taeao, e le o taliaina ai se ava malosi ma o loo tatalo mai pea i le paia o le tatou atunuu ia tapuai saogalemu, tapuai faatamalii.