I le tulai mai o le faalavelave mata’utia o le aafia o se ali’i, ina ua tatui se’i tulou e se talavou o lea ali’i; o lea ua fa’ailoa mai e ala i se ripoti a le leitio faavaomalo a Niu Sila le tuu mai ai o se poloa’iga mai le ofisa o le pule o maliu (Coroner), e tapu ona faailoa faalaua’itele mai i ofisa faasalalau o le suafa ma le tagata ua maliu mai i lenei faalavelave mata’utia.
I ripoti, o lea ua faamaonia mai o le a ua pu’e faapagota ma taofia e leoleo se talavou e 21 tausaga le matua; ma ua molia nei i le moliaga o le fasioti tagata ma le loto iai poo le murder o le amataga o lenei vaiaso lea e faamoemoe e tula’i ai i luma o le faamasinoga faaitumalo o Aukilani.
Faamauina o lē ua fano le ola, e 33 tausaga lona matua, ma e faapea na iai se fe’ese’esea’iga na tula’i mai i le va o ia ma nisi na i se tasi o taavale; o iina na faao’o ai loa manu’aga i lē ua maliu e pei ona tātui ai o ia tulou.
Ta’ua na avatu lea ali’i mo togafitiga i se tasi o falema’i tuma’oti poo local medical centre peita’i na māua le maliu o lea ali’i i le falema’i, ona o le tūgā tele o manu’aga na aafia ai o o ia.
Fa’alia, na talia e le pule o maliu o loo nafa ma lea su’esu’ega – Duty Coroner Errin Woolley lea poloa’iga i le talosaga a leoleo, e aunoa ma le faalauiloa ai i sui ‘au faasalalau .
Ta’ua o le a iai pea lenei poloa’iga seiaq pa’ia le aso 22 o Tesema.
Puna o Faamatalaga: https://www.rnz.co.nz/news/national/581171/coroner-suppresses-name-of-man-stabbed-to-death-in-auckland-s-mt-wellington
