O le faagatama o le kirikiti e le o se taaloga fou ia Samoa o le taaloga ua anoa lona faatinoina i totonu o le atunuu.
Ua faagasolo ai nei le taamilosaga kirikiti Samoa i le motu tele i Salafai i le afioaga o Saipipi ma e tolu vaiaso o loo faia ai.
I le tatala aloaia ai o lenei taamilosaga na muai i le saunoaga autu a le Minisita o Taaloga, Seuula Ioane Tuaau e faamatalatalaina ai le tou lalagaina o le taaloga lenei i le atunuu.
“E tele tu ma aga faa-Samoa o tu faaaloalo e mafua mai ona o aga i taaloga kirikiti.
“E le gata i Samoa nei ae ua oo atu lenei faagatama i le nopiaiga a nai o tatou tagata i atunuu e mamao.
“Afai soo a nuu i ia aso e omai uma lava le nuu e taaalo le ‘au ma fiafia tagata ae faaolomanū le autapuai.
“O inā foi o loo maua mai ai se tasi o faaupuga a le atunuu o le aso ma le filiga o le aso foi ma le mataigatila.”
O le itu tau taaloga o se tasi lenei o vaega o loo mafuli ai le lagolago a le Malo.
“O le manao a le Malo e manao e atina’e soo se taaloga o le ala foi lea e faavagavaga ai se seleni i lalo o le Matagaluega o Taaloga e fesoasoani e atina’e ai taaloga i le atunuu.
“E iai nisi o itumalo o loo faia foi lenei tulaga o le iai lea o sina seleni mai miliona o loo tufa nei e le tatou Malo ina ia mafai ona unaia ai alo ma fanau i taaloga.
“Ia aua ne’i maua ai le tulaga lea o le sue mai o fanau a Samoa o loo alala i atunuu mamao e omai e ave le tagavai o le atunuu ae ia ave le faamuamua e faaaogā ai a o tatou tagata o loo alala i Samoa nei.”
Na ave foi le avanoa i le Faatamā o le Asosi Kirikiti Samoa ia LaaulialeMalietoa Polataivao Fosi Schmidt o le itu tāua i le faagasologa o taamilosaga nei ia lelei ma fiafia uma iai tagata auai.
“Ia faatāua le nonofo fealofani i le va o nuu ma afioaga taalo mataalia ma tausaafia malolo faatamalii.”
Na ia toe momoli ai le feau e faapupula atili ai le logologoā o le taaloga lenei i o tatou tagata o loo aumau i atunuu mamao nai lo Samoa nei.
“Ua sili atu le ola o le kiriti Samoa i fafo nai lo o tatou iinei ua ou vaai ai i le maoopoopoga o le kirikiti Samoa i na atunuu.
“Na tuuina mai ai le talosaga pe mafai ona faia ni liki kirikiti Samoa iinei ae omai ai e taaalo ai.”
O se tasi o itu o loo lagolagoina ai e le Malo taaloga o le faaauauina i le ola maloloina o o tatou tagata e pei ona ta’ua e Laauli.
“Tulaga i le soifua maloloina e tasi lenei mau a le Malo ia faaitiitia lo tatou aafia mai faamai lē pipisi na ua silafia uma lava e tatou ma e ao ona tatou unaia le faamalositino lea foi e fai i kirikiti Samoa.”
Na ia faailoa foi e 10 ‘au i le motu tele i Salafai o loo finauina le manumalo o lenei taamilosaga ma ua mafai ona faataunuuina ona o le lagolago a le Malo ma nisi o ana Matagaluega aemaise pisinisi tuma’oti i meaalofa tupe ma faailoga.
