E lua ni tagi o ni su a le Minisita o Galuega Tetele ua ia faatonuina ni loia e tapena, i le faamoemoe e faamamā ai le suafa o le afioga i le Minisita le tofa Olo Afoa Fiti Vaai.
Ua faailoa mai e le Minisita o le tuua’ia e le ta’ita’i o le Itu Agai ma le sui faipule o Faleata 3, e faapea ua ia faia se auala faaalatua ua lesitala ai le taavale pikiapu Land Cruiser a le matagaluega o loo ia vaaia o sana meatotino, e lē sa’o ma ua afaina ai le tulaga mamalu o le tofi minisita, o le tofi faipule o lona itumalo o Salega 2 aemaise o lona tagata ma lona aiga.
E lē gata ina ave lenei mataupu i le faamasinoga sili a le atunuu ae ua ia faatonuina foi se loia i Ausetalia e faia se su faasaga i se auaunaga tau faasalalau i le leitio ma luga o le api o foliga i totonu o Sini Ausetalia na latou faia se faasalalauga i le taavale ma tuua’ia sese ai foi lona umia o lea taavale o sana meatotino ua faia i luga o ni auala faapiopio ma solitulafono.
