Ua faailoa lautele nei le tapena ai o le aulakapi a tamaitai le Manusina 15 e taalo ma le aulakapi a tamaitai Tonga e tala malae ai, a o lei faia le taaloga autu i le taamilosaga o le Super Rugby Pacific, o le a feiloai ai le Moana Pasifika ma le ‘au malosi a le Melbourne Rebels.
O le taaloga lenei o le a faia i le malae o le Mount Smart Stadium i Aukilani Niu Sila ma o le a avea o se taaloga i le va o ‘au a tamaitai Samoa ma Tonga e fili ai nisi mo ‘au a Samoa ma Tonga i le siamupini o le taamilosaga o le Oceania womens rugby i le masina fou o Me.
O le tausaga na tea nei na feiloai ai ‘au nei e lua ma manumalo ai le Manusina. Ua faaalia e le ofisa sili o le ‘au o le Moana Pasifika le fiafia o le a talimalo i ‘au nei a tamaitai le Manusina 15 ma le Tonga Women A, o le a saga siitia ai pea le atina’e o le lakapi i le itupa o alii ma tamaitai o atunuu o le Pasefika.
