Ua sauni le kamupani vaalele o le Talofa Airways e amatalia ana malaga mai Apia agai i le atunuu tuaoi o Tonga, ina ua iai le isi vaalele e tolu a’i vaa e faia malaga a lea kamupani vaalele.
O le aso 14 o le masina fou o Novema o le a alu ai lea malaga a le Talofa Airways i Tonga, ae ua faamautu foi le faia o ana malaga mo motu o Uea ma Futuna o nisi o teritori o le Malo o Farani i le Pasefika, ae o ni motu e tu lalata mai i motu o Samoa.
O le taimi nei o loo faia pea malaga i le va o Apia ma Pago Pago a lea kamupani vaalele mai le malaevaalele i Faleolo, a o faatali le Talofa Airways e pei ona faailoa e se tasi o le pulega i se taimi e faamautu ai le saogalemu o ona vaalele laiti i le afea o le malaevaalele i Fagalii.
Ua faailoa e le Talofa Airways o le Aso Lulu na taunuu ai i Faleolo lona vaalele fou ma o loo faia iai galuega masani mo le pasia atoatoa o le vaa a o lei faia ana malaga ua fuafuaina.
Ua na o vaalele TwinOtters o le kamupani vaalele o le Samoa Airways o loo faaaogāina le malaevaalele i Fagalii i le taimi nei, talu ona toe tatala lea malaevaalele mo malaga i le va o Apia ma Pago Pago.
