O faaaliga o ulua’i seleselega o fua tau faato’aga e pei ona faatino i totonu o nuu ma afioaga o itumalo faapalota o le atunuu, o lea ua faailoa le tuufaatasi o faaaliga o ulua’i seleselega a nisi o itumalo i le talafatai o Apia, a o nisi o le a avea le maketi i Fugalei ma nofoaga e faia ai a latou faaaliga.
Ua faailoa e le pulega o le matagaluega o faato’aga ma faigafaiva le fuafua tonu o le taimi e faia ai ia faaaliga o ulua’i seleselega i le vaiaso o le a faagasolo ai le Fono a Malo o le Taupulega.
E lē tau fesiligia o se avanoa lelei mo nisi o le a malaga mai i lea fono, e latou te asia ma silasila ai i fua o faato’aga o le a faalauiloa ai.
O itumalo o Faleata 1 ma Faleata 2 ua tuufaatasi a latou faaaliga e faia i le afioaga o Lepea, ae o Faleata 3 ma Faleata 4 o le malae o loo faafesagai ma le faleoloa supamaketi o Farmer Joe i Vaitele, le nofoaga tonu lea sa faamautū iai le faaaliga talu ai nei a Tupai Bruno ma le Magic Circus a Samoa.
O ulua’i seleselega a itumalo o Vaimauga 1 ma Vaimauga 2 o le a faia i le maketi i Fugalei ae o itumalo o Vaimauga 3 ma Vaimauga 4 o le malae taalo o le aoga tulagalua a le Malisi i Mulivai i Apia e faia ai le faalauiloa o a latou fua o faato’aga.
O ia foi ulua’i seleselega o le a faalauiloa ai ma isi oloa gaosi e pei o laei ma oloa o galuega taulima.
A fua atu iai e tusa e valu itumalo o le a faia a latou ulua’i seleselega i le taimi tonu o le fono i le masina fou, ma o itumalo uma e tu lalata i le taulaga.
