E toafitu sui filifilia a le ausiisii u’amea mamafa a Samoa o loo tapena mo lenei tauvaga e faia i Delhi i Initia i le masina fou o Iulai.
Na saunoa le Afioga Tuaopepe Asiata Jerry Wallwork o ia foi o loo faiaoga ai, o i latou ua filifilia e malaga atu i lenei faamoemoe o nisi o loo maualuga lo latou taumafai lea o loo sauni mo lenei tauvaga.
“Ua mae’a ona filiina le tatou ‘au ma ua leva ona faia tapenaga mo lenei faamoemoe o loo faatino lava i vaiaso uma.
“E pei ona silafia o le tauvaga i le 2019 lea sa maua ai a tatou pine auro e 5, 2 pine siliva ma le 1 pine apamemea e faamoemoe lava i le Alii e aumaia le malosi i taumafaiga a le fanau.”
E tolu vaega o loo agai ai lenei tauvaga o le vaega laiti (Junior), Vaega Talavou (Youth) ma le vaega Matutua (Senior) ma o le ‘au a Samoa e toalua tamaitai e aofia ai Lesila Fiapule, Iuniarra Sipaia ma le toalima o alii Nevo Ioane, John Tafi, Maeu Nanai Livi, Don Opeloge ma Sagele Mao.
