O le toe amata ai i le tausaga nei ona faafoi e le malo polokalame ma sauniga uma o le faamanatuina o le Tuto’atasi i le tolu aso, ua silasila ai ma le malo e faatino se polokalame e manatua ai ma toa magumagu o sa’iliga malo mai taimi o pulega faakolone se’ia oo ina maua le malo Tuto’atasi o Samoa.
O lea ua faailoa ai e le Palemia susuga Laaulialemalietoa Leuatea Polataivao Fosi, o se isi lea o silasila mamao a le faigāmalo, ia iai se National Day poo se aso mo tagata uma o le atunuu, e manatua ai ta’ita’i ma toa o sa’iligamalo auā o le sao o ia ta’ita’i e lē faaitiitia le tāua, ma ua faamauina foi i talafaasolopito o Samoa.
O le tuto’atasi o le a faamanatu ai le aulia o le 64 tausaga o le malo tuma’oti o Samoa i lenei tausaga o le a faia ai ma le sauniga e tauaao ai pine taualoa, e manatua ai ia ta’ita’i ma tagata o le atunuu ua iloga o latou sao i tautua eseese mo le atina’e manuia o le malo, ekalesia, nuu ma aiga.
O le feiloa’iga a tusitala ma le Palemia susuga Laaulialemalietoa Leuatea Polataivao Fosi na faailoa ai ia tapenaga.
O se tasi o tamalii ma toa o sa’iligamalo a Samoa i taimi o pulega faakolone a le malo o Siamani i lo tatou atunuu o le tofa Lauaki Namulauulu Mamoe.
O le ulua’i ta’ita’i lea o le mau na amata mai Puleono i Salafai sa tetee malosi i pulega a Siamani ma māfua ai ona faaaunuua lea tamalii ma nisi na lagolagoina o ia i le atunuu o Saipani i le tausaga e 1909.
Na maliu ia Tesema o le tausaga e 1915 i le aai o Tarawa ua avea nei ma laumua o Kilipati.
O talosaga a lona aiga ma pulegamalo a Niu Sila sa iai i Samoa na toe liutofaga mai ai o ia i le masina o Me o le tausaga e 1920 ma lagomau ai nei i Safotulafai i lona aiga.
