O le aso 19 o Ianuari o le tausaga fou 2025 o le a iloilo ai e le Faamasinoga Maualuga, se faasalaga e tuuina atu i nisi o matai o le nuu o Afega ua faamaonia o latou moliaga o le lē usita’i i le faai’uga a le faamasinoga poo le contempt of court.

O le faai’uga lea na fofogaina i le aso 11 o Oketopa o le tausaga nei 2024 lea na faia ai le poloa’iga ina ia taofia le toe faia o ni galuega i luga o fanua o loo aafia i le finauga i le va o afioaga o Leauvaa ma Afega.

O matai o Afega ua faamaonia lo latou lē usita’ia o lea faai’uga o le tofa Maulolo Tavita Amosa, afioga Ututaaloga Charlie Ulia, tofa Fata Roketi, ma le fetalaiga ia Fata Vaafai Tolutasi.

O le Aso Gafua o lenei vaiaso na aumai ai lea faai’uga a le Faamasinoga Sili ina ua mae’a ona su’esu’e i luma o le afioga i le Faamasino Sili, afioga Satiu Leatigagaeono Perese le talosaga a le afioga Sala Fili Lauano ma isi mo Alii ma Faipule o le nuu o Leauvaa, sa folasia ai molimau tusitusia na faailoa ai gaioiga e pei o le suaina o laau totō tau faato’aga, faaleaga o pa o fanua, faapāpā o se laau malosi, lafo o upu malolosi, umia o agaese ua faamatalaina o ni sapelu se’i tulou ma le faia o ni lafoga taufaamata’u.  O se tasi o mau sa tuuina atu e le itu talosaga e lagolago ai le lē usita’ia e Afega o le faai’uga na faia ai le poloa’iga, o se finagalo o le tofa Maulolo Tavita Amosa i le faletelevise o le TV1 i Mulinuu, na ia faaalia e lē usita’ia e lo latou nuu le faai’uga.

Ua faamatalaina lea finagalo, o se a’itui ma le lē faaloalo lea i le faamasinoga.

O le finagalo o le Faamasino Sili, a iai se isi o itu o lenei mataupu e maua i se loto tigā o loo iai auala e uia e pei o le faamasinoga o talosaga apili.

Ua faaalia foi i le faai’uga lenei e iai malosi’aga o le Faamasinoga Maualuga poo le Faamasinoga Sili a Samoa i le tulafono faavae e mafai ai ona tuuina atu sea poloa’iga, e ui poo le ā lava le eseesega ua molimauina i le va nonofo ai o le faamasinoga e faasino i le Faamasinoga o Fanua ma Suafa.

Na faaalia e le Faamasino Sili, o lea malosi’aga o le faamasinoga e sili ona maualuga a Samoa e aga’i tonu i le tulaga o le faatāuaina, faamamalu ma le faamalosia o tulafono poo le Rule of Law. 

Ua faatonuina e le Faamasino Sili le tuuina atu o se kopi o lana faai’uga i le Komesina o leoleo ina ia silasila iai, po ua iai ni aafiaga o le solia o le tulafono o laau malosi i le gaioiga na faapāpā ai se fana e tusa o molimau sa tuuina atu a le itu talosaga.

Ua faatonuina foi se kopi o le faai’uga e tuuina atu i le afioga i le Fofoga Fetalai o le Palemene, ona o se tasi o matai o loo ua faamaonia moliaga o le lē usita’i i le faai’uga a le faamasinoga, o loo avea ma sui usufono o le Palemene le tofa ia Maulolo Tavita Amosa. 

O se finagalo o le tofa Maulolo Tavita Amosa ina ua mae’a ona lau le faai’uga a le Faamasinoga Sili.