A o lei amataina galuega a le Maota i le mae’a ai ona faatauto o sui faipule tamaitai faaopoopo o le Palemene, sa tāpā ai e le Fofoga Fetalai se faatoesega mai le sui faipule o Vaimauga 1, afioga Sulamanaia Fetaia’i Tuivasa ina ua toe auai atu i totonu o le maota fono talu mai le aso na faasala ai ma faatulai ese mai le maota fono, ona o se aga na faaali e le sui faipule e lei mamalu ma tusa ai ma amioga taualoa a sui o le Palemene.
O le mataupu na tulai mai le fonotaga a le Palemene talu ai, na siisii ai lafoga felafoa’i a le taitai o le Itu agai ma se tasi o sui faipule o le latou vaega, e faasaga atu i le afioga i le Minisita o Faatoaga ma Faigafaiva. O le felafoa’iga na o lagona siisii na maona a’e ai se e’e a se tasi mai totonu o sui faipule, ma valaau mai se lafoga ‘se o age e pigi’. Na vave ona tulai a’e le afioga i le Tamaitai Palemia ma faatū loa le lafo i le Fofoga Fetalai ina ia ave ese i fafo mai le maota le tagata lea na e’e.
O le faaleo ai la o le faatoesega a le sui faipule na tali fuaitau ai le Fofoga Fetalai ma talia le faatoesega a le sui, ma toe faaauau ai galuega a le maota.
