Ua lē maua e leoleo ni mau e lagolago ai le tagi na faaulu e le taitai o le vaega faaupufai e Puipuia Aiā Tatau o Tagata le HRPP le susuga Tuilaepa Lupesoliai Sailele Malielegaoi lea na tu’uaia ai le taitai o le vaega faaupufai a le Faatuatua i le Atua Samoa ua Tasi Fiame Naomi Mataafa i lona faia o ni saunoaga i se feiloaiga ma tusitala i le masina o Iulai o le tausaga na te’a nei na tu’uaia e Tuilaepa e faapea o ni saunoaga ua faaleaga ai lona tagata.
O ia tala e pei ona sa lipotia ai i lea taimi o le tausaga na te’a nei na tali atu ai le afioga Fiame Naomi Mataafa i ni lafoga a le taitai o le vagea faaupufai a le HRPP na tuuaia ai o ia o le taitai o le FAST ma nisi o sui faipule o lea patī i le faia o ni feilaoiga ma le faamasino Sili.
Na tuuaia foi e Tuilaepa le faamasinoga ia latou faaiuga faaituau i le FAST e pei ona avea ai ma faigamalo fou. O le tali atu la a Fiame i ia lafoga ma tuuaiga na mafua ai ona faaulu le tagi a Tuilaepa.
Ua faailoa e leoleo ua leai ni molimau e lagolago ai le tagi a Tuilaepa ma ua lē faaauauina ai suesuega.
