O le faamanatuina ai o le aso faavaomalo mo Tina ma Tamaitai i le lalolagi i lenei tausaga ua faamamafa ai le ulutala “Break the Bias” poo le
Gagau faiga faailogalanu ma faiga faapitoa faasaga o tina ma tamaitai.
O lenei aso faavaomalo e faamanatu e le lalolagi atoa e aofai ai ma Samoa, o se aso e toe susue ai mafaufauga ma tuutuu i le loloto finagalo i auala ma faiga taofia ai nei gaioiga i le sini ma le faamoemoe e siitia le tulaga o tina ma tamaitai ma aveese ai faiga ma pulega e saisaitia ma tuu maualalo ai lo latou tulaga amanaia ma aloaia i soo se auaunaga ma tautua.
O le tulaga tutusa o tamaitai i soo se faiga filifiliga ma le fefaaaliaina o lagona ma manatu o se isi lea vaega taua i le autu o lenei tausaga ia gagau ma taofia faiga faapito ma faailoga tagata faasaga iai latou.
Na faia se sauniga faapitoa i le amataga o le vaiaso na faamanatu ai lenei aso faavaomalo taua na saunoa ai le taitai o le atunuu ma ia faailoa o le amanaia ma le faataua a le Mālō o lenei aso e faavae i le manulauti ia unaia avanoa tutusa mo tagata uma.
O le faamanatuina o lenei aso faavaomalo i le amataga o se faamoemoe na alia’e ina ua lalaga mai manatu o tina ma tamaitai i le vaitau o le seneturi 19 i faiga lē tutusa na aafia ai i le faaletonu o le latou galuega ona o le lē maua o aiā tutusa faatasi ma le lē faatagaiga o tamaitai ia iai so latou leo i taimi o faiga palota i le tele o atunuu o le lalolagi.
