Ua taofia nei galuega a Leoleo ma le Pulega o Tineimu ma Faalavelave Faafuasei i le sailiga o le tino o se tasi o taule’ale’a na malemo i Samalaeulu i Savaii i le faaiuga o le vaiaso na tea nei.
Taua e le Komesina o Pulega o le Tineimu Tanuvasa Petone Mauga o le faaiuga e ala i le taofia o le sailiga o le tino maliu o lea taule’ale’a na faia ina ua maea ni feutagaiga i le va o le Matagaluega o Leoleo ma le Pulega o Tineimu ma Faalavelave Faafuasei.
Na faamaonia foi e le Sui Komesina o Leoleo Auapaau Logoitino Filipo lea mataupu i se feiloaiga ma tusitala i le vaiaso nei.
“O le taimi nei o lea ua taofi suesuega a leoleo ma e tasi lava le tino na mafai ona maua mai ae ona o le tulaga o le aave o galu ma le leaga o le tau .”
E pei ona silafia o taulele’a e toalua lea na aafia i le faalavelave e aiga ma na agai e taeele i le Aso Sa Aso 30 o Ianuari ae taia ai loa i le malolosi o galu ma maliliu ai. Peitai na mafai ona maua le tino maliu o le tasi ae o leisi lea e le’i maua lava ma i’u ai ina taofia ai loa ma galuega saili a leoleo.
