Ua i luma nei o le Kapeneta mo manatu faaalia le talosaga ina ia toe tuu eseese le Matagaluega o Leoleo ma le Falepuipui talu ona tuufaatasi e le faigamalo na se’i mavae atu nei.
Na faamaonia lea gaioiga e ala i le tuuina atu o le talosaga i le Kapeneta e le Minisita o Leoleo, Falepuipui ma le Ola Toe Fuataina Faualo Harry Schuster. Taua e Faualo i le Samoa Observer o loo iai pea i tulaga tau amata le talosaga ma e le agai sa’o loa le Mālō e fai se faaiuga i se taimi vave.
“O lea talosaga o loo tagatagai ai nei le Kapeneta ma e lē faapea o le a faia loa ni suiga i le taimi nei”
O le manatu o le Minisita ina ua fesiligia i le mafuaaga ua iai le manatu e vavae nei vaega ona o le telē o le eseesega o galuega, o Leoleo e feagai ma suesuega, ma faia moliaga peitai o le Falepuipui ma le Ola toe fuataina e feagai lea ma pagota ma faia polokalame toe faaleleia mo tagata e molia atu.
“E eseese vaega ia e lua, e ese le vaai a leoleo i tagata solitulafono ona o le latou matafaioi o le puipui o le tulafono ma mautinoa e tumau le filemu ae le’o le vaaia o le falepuipui. E le’o se galuega a Leoleo le toe vaaia o tagata na o latou ave iai faasalaga”.
O le manatu autu lava o le talosaga na tuuina atu e le Minisita ina ia iai se suiga lelei o polokalame toe faaleleia poo rehabilitation programs ma e manaomia ai le vaega o le ola toe fuataina e galulue ai i lea vaega e aunoa ma le fesoasoani a leoleo.
