Tusia: Maina Vai
O le talosaga a Talalelei Pauga e faataatia iloiloga a le faamasinoga i le mataupu faatatau ia te ia seia maea mai le faagasologa o lana apili i Ausetalia, sa aofia ai i tolaulauga a le Faamasinoga Maualuga ananafi.
O Mati o le tausaga nei lea ua faatulaga e iloilo ai le apili a Talalelei Pauga i Ausetalia i le faaiuga o le Faamasinoga a Ausetalia e toe faafoi mai Pauga i Samoa nei.
O le mataupu i Samoa nei na toe valaau ia Tesema o le tausaga ua mavae ma faatulaga mai e le Faamasinoga le aso 28 o le masina nei e suesue ma iloilo ai le talafeagai ai ona faataatia iloiloga a le Faamasinoga Maualuga seia maea mai le mataupu i Ausetalia.
O le tulai atu o le Susuga ia Senetenari Autagavaia mo Tufuga Fagaloa Tufuga o le alii loia o loo tulai mo Pauga ona na aofia mai lea mataupu i faatulagaga a le Faamasinoga e masani ai.
Talu ai lea tulaga ua poloaiina ai nei e le Faamasinoga le itu a leoleo ia faila atu la latou faasilasilaga pe latou te teena lea talosaga i le Aso Gafua o le vaiaso fou, ae ia faila atu finauga o lea mataupu e itu e lua i le aso 25 a’o lumanai ai le 28 e faia ai le suesuega a le Faamasinoga.
O Talalei Pauga na taofia e leoleo i Queensland Ausetalia ina ua talosaga atu le malo o Samoa e faafoi mai e tali i ona moliaga o le taupulepule lea e fasioti le sa avea ma Palemia o Samoa ia Tuilaepa Sailele Malielegaoi.
O loo finau atu Pauga i le faamasinoga toe iloilo i le taimi nei e ala i lana talosaga apili… e toe iloilo ai le faaiuga e faafoi mai o ia i Samoa e tali i ona moliaga.
