Ua i luma nei o le Minisita o Galuega Tetele ma Vaalele Sivili, le talosaga a le pulega o le kamupani vaalele o le Virgin Australia, mo le toe faafou o lona laisene e mafai ai ona lele mai ona vaa ma afea lo tatou atunuu.
Ua faasalalau faalauaitele le talosaga lenei, a o loma le toe amatalia o malaga a lea kamupani vaalele e tautua ai Samoa i le masina o Mati o le tausaga nei o le a faaaoga se vaalele tele o le Virgin Australia o le ituaiga o le Boeing 737-800.
O Iuni o le tausaga na tea nei na faailoa ai e lea kamupani vaalele le toe faia o ana malaga tuusa’o mai i Samoa e pei ona fuafuaina e tasi le malaga mai Bisbane ma le malaga mai Sini.
O le aso 21 ma le aso 23 o Mati o loo faatulaga e amata ai ia malaga tuusa’o, peitai e faatoa faamautu lea fuafuaga pe a talia lana talosaga mo le toe faafouina o lona laisene.
Ua faailoa e le kamupani vaalele afai e toe faaauau ana malaga mo Samoa o loo iai le fuafuaga e lua ana malaga i le vaiaso mai Sini faapea ma Brisbane ma e iai le talitonuga o se isi lea avanoa lelei mo tagata malaga mai i le atunuu e maua ai avanoa e tele.
Ma o le a tolu ai kamupani vaalele e faia malaga mai Ausetalia mo Samoa, e pei ona iai le tautua i le taimi nei a le Fiji Airways ma le isi kamupani vaalele a Ausetalia le Qantas.
E pei ona silafia o le taimi nei talu mai le masina o Aokuso o le tausaga ua mavae na toe tatala ai malaga masani faavaomalo e afea ai lo tatou atunuu lea ua lima ai nei masina, ua na o le kamupai vaalele o le Air New Zealand o loo faia malaga i le va o Samoa ma Aotearoa Niu Sila.
